Vieiros

"De levarse a cabo este proxecto de macrodepuradora sería tirar cos cartos públicos nun proxecto inútil, e o desastre medio ambiental e económico para a nosa terra e o mar sería irreversíbel", agoiran desde a plataforma cidadá A Ría non se Vende.

Tal é a avaliación que fan da macrodepuradora proxectada na cidade, que definen de "aberrante proxecto faraónico". Para o colectivo, non só non sería efectiva "senón que amplificaría a problemática actual. Entre as críticas: non se contempla separar as augas residuais urbanas das augas das industrias que inutilizan o sistema de depuración, e das augas pluviais que colapsan os tanques. "As depuradoras están pensadas para depurar materia orgánica, os produtos químicos e disolventes das industrias paralízanas e inutilízanas totalmente", sinalan.

Por este motivo, e diante do que salientan que é unha necesidade urxente da Ría de Vigo nun escenario de "contaminación dramática", convocaron a cidadanía este sábado a unha cadea humana diante da actual depuradora de Coruxo (ás 19h).