Vieiros

Só na comarca do Salnés hai máis de 70 furanchos, grazas á "permisividade" que segundo a Unión de Profesionais e Traballadores Autónomos de Galicia manteñen os concellos desta comarca con este tipo de locais. De feito a UPTA vén de presentar unha denuncia contra os concellos de Cambados, Meis, Meaño, Ribadumia e Sanxenxo, logo de comprobar un incremento na actividade dos furanchos coa celebración de comuñóns, bautizos e outros banquetes que lles achegan uns ingresos que perden os estabelecementos legalizados e dedicados a este tipo de eventos.

Previamente os hostaleiros reuníranse co Director Xeral de Turismo, Rubén Lois, que lles asegurou que tomaría medidas unha vez presentadas estas denuncias nos concellos. A consellaría posúe datos de que en toda Galiza pode haber uns 700 furanchos, "algo que nos deixa atónitos", asegurou Lois, quen engadiu que son "consecientes da competencia desleal" que estes estabelecementos supoñen para a hostalería pontevedresa.

Por outra banda están quen defenden a tradición destes lugares como parte do noso patrimonio, e nos últimos anos o propio sector estase asociando para defenderse dos ataques que lles choven cada vez con máis dureza, a consecuencia do crecente éxito dos furanchos sobre todo entre os visitantes da zona. Mesmo están a ampliar a tempada tradicional, que antes era no inverno e a primavera, até o verán. Iso si, de tapadillo.